Plantun de Prouvènço

Pèr coumpara dos planto d'encò nostre

Najas gracillima & Plumbago europaea

Naïado(-primo)

Najas gracillima

Hydrocharitaceae

Autre noum : Limoun.

Nom en français : Naïade gracile.

Descripcioun :
Aquesto naiado, que nous vèn d'Americo dóu Nord, trachis dins li risiero de Camargo. Èi la mai primo de tóuti li naiado que rèston aro au nostre. Li fueio soun larjo de 0,2 à 0,5 mm e subretout verticillado pèr mai que tres (au contro de Najas minor e Najas indica). Poudèn apoundre que li fueio se roumpon pas tant d'aise aqui.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : erbo
Taio : 10 à 50 cm
Fueio : costo paralèlo
Tipe bioulougico : Idroufite
Cicle bioulougico : Planto de l'an

Gènre : Najas
Famiho : Hydrocharitaceae

Ordre : Alismatales

Coulour de la flour : Verdo
Petalo : 3
Ø (o loungour) flour : 1 mm
Flourido : Printèms - Estiéu

Sòu : Ca
Autour basso e auto : 0 à 400 m
Aparado : Noun
Jun à setèmbre

Liò : Aigo - Risiero
Estànci : Termoumediterran à Mesoumediterran
Couroulougi : Óurigino Americo dóu Nord
Ref. sc. : Najas gracillima (A.Braun ex Engelm.) Magnus, 1870

Erbo-di-rascas

Plumbago europaea

Plumbaginaceae

Àutri noum : Erbo-enrabiado, Bagoun, Erbo-de-la-rougno, Erbo-di-couquin, Malo-erbo.

Noms en français : Dentelaire, Malherbe.

Descripcioun :
L'erbo-di-racas, mens coumuno qu'à passa tèms, trachis en ribo de camin, i pèd de muraio e dins lis escoumbre ounte flouris amé de poulìdi flour vióuleto, à la fin de l'estiéu. Es uno planto eisado de recounèisse emé si flour e si fru pegous qu'arrapon li péu e li teissu.

Usanço :
Èi couneigudo au nostre pèr garris la rasco. Ramentèn qu'aquesto malautié de pèu e de péu s'aprèn à de champignoun coume Microsporum canis. Freta la bèsti emé d'òli de bagoun (adouba en fasèn bouli la planto dins l'òli). Se dis peréu qu'en mastegant la racino, apaisso li ràbi de dènt (erbo-enrabiado)-TdF. Pamens se n'en fau mesfissa que fretado sus la pèu pòu douna d'enflamacioun.